ШҚО-да ер адам жанып жатқан үйге құжаттарын алуға кіріп, күйіп қалды

ӨСКЕМЕН. ҚазАқпарат - Шығыс Қазақстан облысында ер адам жанып жатқан үйге құжаттарын алу үшін қайта келіп, күйіп қалды, деп хабарлайды «ҚазАқпарат» ХАА тілшісі ШҚО ТЖД баспасөз қызметіне сілтеме жасап. 

«Бүгін түнде Зырянов ауданы Зубовск кентінде өрт шықты. 58 жастағы ер адам дәліздің жанып жатқанын байқап, үйден шығып кеткен. Бірақ, кейін үйде құжаттары мен бағалы заттарының қалып қойғаны есіне түсіп, ішке кіреді. Жанып жатқан дәлізден өткенде оның беті, қолы мен аяғы күйіп қалған», - делінген хабарламада.


Өрттің шыққанын байқаған көршілері өрт сөндірушілерді шақырған. Олар өрт шыққан орынға 20 минутта жеткен.



«Біз келгенге дейін зардап шегуші көршілерінен қалалық ауруханаға жеткізуді сұраған. Тілсіз жауды ауыздықтауға 50 минут қажет болған. Екі өрт сөндіру машинасы мен жеке құрамның 5 адамы жұмыс істеді. Өрттің жалпы аумағы 120 шаршы метрді құрайды», - деді №3 өрт сөндіру бөлімінің басшысы Ержан Өмірбаев.