Шахандағы төтенше жағдай бойынша тексеру жұмыстарымен арнайы прокуратура айналысады
«Алдымен бұл оқиға Қарағанды облысының ІІД-де адам өліміне алып келген өрт қауіпсіздігі ережелерін бұзу әрекеті ретінде бағаланған болатын. Алайда бұл мәселенің өте өзектілігін назарға ала отырып, сондай-ақ төтенше жағдаймен байланысты барлық фактілердің жан-жақты және объективті түрде тексерілуін қамтамасыз ету мақсатында ҚР Бас прокуратурасы аталмыш іс бойынша одан әрі тергеу жұмыстарын Қарағанды облысының арнайы прокуратурасына беру жөнінде шешім қабылдады»,-делінген хабарламада.
Ведомствоның мәліметтері бойынша, 16 қаңтар күні облыстың арнайы прокурорлар басқармасы қылмыстық істі өндіріске алды.
Сонымен қатар бұрын ҚР ҚК-нің 2 бөлімі 281 бабына өзгертілді. Сонымен қатар жарылысқа қатысты сараптама жұмыстарының нәтижелері мәлім болды. Онда көпқабатты үйдің құлауына жылу қазандығының жарылуы себеп болғандығы расталған.
Естеріңізге сала кетейік, 1 қаңтар күні 22 сағат 40 минутта Қарағанды облысының Шахан кентіндегі тұрғын үйдің бір бөлігі құлады. Қираған үйдің астында 9 адам мерт болды. Оның үшеуі балалар. Алдын ала мәліметтер бойынша, қайғылы жағдай автоматты жылу қазандығының дұрыс жұмыс істемеуіне байланысты орын алған.