Сенатта салық салу туралы Қазақстан-Әзербайжан конвенциясына түзетулер талқыланды

АСТАНА. ҚазАқпарат - Парламент Сенаты Қаржы және бюджет комитетінің кеңейтілген отырысында  «1996 жылғы 16 қыркүйектегі Қазақстан Республикасының Үкiметi мен Әзербайжан Республикасының Үкiметi арасындағы табыс пен мүлiкке қосарланған салық салуды болдырмау және салық төлеуден жалтаруға жол бермеу туралы конвенцияға өзгерістер мен толықтырулар енгізу туралы Қазақстан Республикасының Үкiметi мен Әзербайжан Республикасының Үкiметi арасындағы хаттаманы ратификациялау туралы» заң жобасы қаралды. Бұл туралы палатаның баспасөз қызметінен хабарлады.  

Хаттамамен «Қазақстан», «Әзербайжан» деген терминдерге өзгерістер енгізілді, сондай-ақ қолданыстағы заңнамаға сәйкес оларға Конвенция қолданылатын Қазақстан және Әзербайжан салықтарының атаулары нақтыланды. Жаңа мәтінде уағдаласушы мемлекеттерде резиденттікті айқындауды және тұрақты мекеме құру тәртібін реттейтін баптардың ережелері нақтыланды.

Салық қызметтерінің арасындағы ынтымақтастықты кеңейту және ЭЫДҰ-ның модельдік конвенциясына сәйкес келтіру мақсатында «Қосарланған салық салуды жою» және «Ақпарат алмасу» деген баптарға түзетулер енгізілді. «Жеңілдіктерді шектеу» деген жаңа бап көзделуде, ол салықтық жалтарулар және Конвенцияның ережелерін теріс пайдаланулар анықталған кезде ішкі заңнаманы қолдануға мүмкіндік береді.

Заң жобасы палатаның қарауына жіберілді.