«Самұрық-Қазына» АҚ тәуелсіз директоры өмірден озды

АСТАНА. ҚазАқпарат - 68 жасқа қараған шағында «Самұрық-Қазына» қорының тәуелсіз директоры, директорлар кеңесінің мүшесі Барон Оливье Дэкамп дүниеден өтті, деп хабарланды компанияның сайтында .

«Оны мейірімділік, барлық қызметкерлерге құрметпен қарау, кішіпейілдік қасиеттері ерекшеледі. Дегенмен, Оливье Дэкамп Қордың стратегиялық мақсаттарына қатысты мәселелерде асқан жауапкершіліктің, табандылық пен қажырлықтың үлгісін көрсетті.

«Самұрық-Қазына» қорының ұжымы Барон Оливье Дэкамптың туған-туыстарына көңіл білдіреді», делінген мәтінде.

Оның жаһандық корпоративтік қаржы және дамушы нарықтар саласындағы жоғары буындағы басшы ретінде 40 жылдық тәжірибесі бар еді. Оливье Дэкамп еңбек жолын банк саласында Бразилияның Chase Manhattan Bank-інен бастап, кейін оны АҚШ-та және Ұлыбританияда жалғастырды. Ол 1993 жылы Еуропалық қайта құру және даму банкiнің жаңадан бекітілген командасына кірді және 2015 жылға дейін 34 мемлекеттегі операцияларға жауап беріп, банк стратегиясы және саясаты жөніндегі комитеттің мүшесі болды.

Барон Оливье Дэкамп ҚР Үкіметінің 2015 жылғы 29 желтоқсандағы № 1113 қаулысымен «Самұрық-Қазына» АҚ Директорлары кеңесінің құрамына тәуелсіз директор ретінде тағайындалды. Ол Аудит жөніндегі комитеттің және Тағайындаулар және сыйақылар жөніндегі комитеттің мүшесі болды.