Өскемен тұрғыны қатты сөйлегені үшін танысына оқ атқан

АСТАНА. ҚазАқпарат - Облыс орталығында жас жігіт қатты сөйлегені үшін травматикалық тапаншадан жаңа танысының бетіне оқ атқан, деп хабарлады YK-news.kz.

Оқиға жалдамалы пәтерде болған, онда бір топ достар арақ-шарап ішкен. Жігіттердің көпшілігі ұйқыға кеткенде пәтерге жаңа қонақ келген. Жас жігіттің айтуынша, қонақ қатты шулаған. Туындаған жанжалды шешу үшін екеуі көшеге шығып кеткен. Ішімдікке мас жігіт травматикалық тапаншадан қонақтың бетіне оқ атқан. Зардап шегуші ауыр жарақат алып, бір көзінен айырылды.

Сотта 26 жастағы ер адам тыйым салынған қаруды көшеден тауып алғанын, оқиғаға дейін тапаншаны полицияға тапсырғысы келгенін айтты.

Жас жігіт бұрын да ауыр қылмыс үшін сотталған. Өскемен қаласының №2 соты оны қатаң режимдегі колонияда үш жыл жазасын өтеу туралы үкім шығарды.