Оралда БАҚ саласының қызметкерлері марапатталды
БАҚ саласының қызметкерлерін кәсіби мерекелерімен облыс әкімі Алтай Көлгінов құттықтады.
«Барша қоғам елімізде болып жатқан жаңалық-өзгерістер, түрлі оқиғалар жөнінде журналистер арқылы ақпарат алып отырады. Оны жедел де сапалы жеткізу әркімнің кәсіби шеберлігіне байланысты. Қазіргі таңда өңірде сексеннен астам бұқаралық ақпарат құралдары болса, соның 55 пайызы - жеке меншік БАҚ-тар. Оларды мемлекет тарапынан қолдау жұмыстары жасалып келеді. Өйткені Елбасымыз «Рухани жаңғыру» бағдарламасында, сондай-ақ «100 нақты қадам» Ұлт жоспарында ашықтық пен жариялылықты, халыққа барынша жақын болуды басты міндет етіп қойды. Осы орайда мемлекет жүргізіп отырған сан салалы саясатты да елге жеткізетін журналистер. Қазір ақпараттың желдей жүйткіген заманы. Бүгінгі жаңалық ертең ескіріп қалады. Әлеуметтік желілер, ғаламтор қауырт дамып келеді. Сондықтан БАҚ өкілдеріне қойылар талап та күшейді. Биыл өңірлік «Орал өңірі» және «Приуралье» газеттерінің шыға бастағанына тура бір ғасыр толғалы отыр. Жүз жыл ішінде бұқаралық ақпарат құралдарының қандай өзгеріске ұшырағанын, нендей жолдан өткенін ардагерлер жақсы біледі. Олардың да еңбегін біз ешқашан ұмытпаймыз. БАҚ саласындағы ұрпақтар сабақтастығы бұдан былай да жарасымын тауып, шеберлік тіні үзілмей, жалғаса беретін болады», деді өңір басшысы.
Журналистерді мерекемен сондай-ақ «Орталық коммуникациялар қызметі» РММ директоры Артур Нығметов құттықтап, ізгі тілегін білдірді. Сала үздіктеріне облыс әкімінің және «Орталық коммуникациялар қызметі» РММ-ның алғысхаттары табыс етілді.
Марапатталғандардың қатарында облыстық «Орал өңірі» және «Приуралье» газеті редакциясының ұжымдары, республикалық «Егемен Қазақстан», «Казахстанская правда» газеттерінің меншікті тілшілері Қазбек Қабжанов пен Марина Иванова, «ҚазАқпарат» ХАА өңірлік тілшісі Ғайсағали Сейтақ және басқалар бар екенін айта кетейік.
