Оралда 300 бейнекамера орнату көзделуде

ОРАЛ. ҚазАқпарат - Жуырда Орал қаласында 300 бейнекамера орнату көзделуде. Бұл туралы Батыс Қазақстан облысының әкімі Алтай Көлгіновтің төрағалық етуімен «Smart City» жобасы аясында облыс орталығында бейнебақылау қондырғыларын орнату мәселесі талқыланған жиында айтылды, деп хабарлайды «ҚазАқпарат» ХАА тілшісі.

Онда азаматтардың қауіпсіздігін қамтамасыз ету, олардың құқығы мен мүддесін қорғау, көше тыныштығы мен жол қозғалысы ережесін сақтау мақсатында бейнекамера орнатудың маңыздылығы аталып өтілді. Бұған осыған дейін Астана қаласында бейнеқондырғылар орнатып, біраз тәжірибе жинақтаған «Сергек» компаниясының ақпараттық, техникалық әлеуеті жететіні сөз болды. 300 бейнекамераның басым көпшілігін аталмыш компания мемлекеттік-жекеменшік әріптестік негізінде орнатуға дайын екендігін жеткізді.

Айта кетейік, «Сергек» компаниясы осындай бейнекамераның бірін өткен жылы қаланың М.Шолохов көшесінде орнатып көрген болатын.

Бұл бағыттағы жұмыстар жол-көлік оқиғаларының алдын алып, қылмысты ашуға, ең бастысы, тұрғындардың қауіпсіздігін нығайтуға мүмкіндік бермек.