Он минутқа шығып кеткен қарағандылық азамат іздестірілуде
«6 шілде күні Ришатқа әлдебіреулер қоңырау шалып, ол Восток-1 шағын ауданындағы үйінен 10 минуттан соң қайтып оралатынын айтып шығып кеткен. Содан бері із-түссіз жоқ», - дейді Ришат Мұхамедияровтың туысы Гузаль Ысқақова.
Гузальға аталған іздеу ісін жүргізіп жатқан тергеуші іздеу жұмыстарының барысы жайлы алаңдап отырған туысқандарына хабарлаудың қажеті жоқ екендігін айтқан.
«Тергеушіге қайта-қайта қоңырау шалып отырмыз, ол тіпті жауап бермейді, қайтып хабарласпайды да. Екі апта болды есеңгіреп отырмыз», - дейді жоғалған азаматтың туысы.
Полиция қызметкерлері Ришат Мұхамедияровты іздеу жұмыстарын Жаңа-Майқұдық полиция бөлімшесі жүргізіп жатқандығын айтты.
«Жоғалған азамат жайлы қандай да бір ақпарат білетіндердің 8 (7212) 24-33-90, 40-79-19 немесе 102 телефондарына хабарласуын сұраймыз», - деп хабарлайды Қарағанды облысы ішкі істер департаментінің баспасөз қызметі.
Жоғалған азаматтың белгілері: бойы - 180 сантиметр, арық, шаштары күңгірт сары түсті. Ақ футболка, көк шолақ шалбар, көк аяқ киім киген.