Омбудсмен оңтүстіктегі 7 жасар балаға қатысты жағдайды бақылауға алды
«2017 жылдың тамыз айында Оңтүстік Қазақстан облысы Сарыағаш ауданының Абай ауылындағы Ж. Баласағұн атындағы мектеп-гимназиясының жоғары сыныбы оқушыларының бірінші сынып оқушысына қатысты жыныстық сипаттағы әрекеттеріне байланысты БАҚ-та орын алған хабарламалар кең қоғамдық резонанс тудырды. Қазақстанның Омбудсмені осы істі тергеудің ұзаққа созылғандығына алаңдаушылық білдірді. Бұл оқиғаның түрліше түсіндірілуінің және кәмелетке толмаған баланың құқықтарын қалпына келтірілуіне уақытылы әрекет ету шараларын қабылдамаудың негізі болып табылады» делінген баспасөз баянында.
Бұдан бөлек, омбудсмен зардап шеккен баланың физикалық және психоэмоционалдық жағдайы бұзылғандықтан қажетті көмек көрсету мәселесі маңызды екенін атап өтеді.
«Бұл жағдай ҚР Омбудсменінің бақылауына алынды. Тиісті ресми сұраулар ҚР Бас прокуратурасына, Ішкі істер министрлігіне және Білім және ғылым министрлігі Балалардың құқықтарын қорғау комитетіне жан-жақты әрекет ету шаралары үшін жіберілді» делінген баспасөз баянында.
Еске сала кетейік, әлеуметтік желіде «Абай ауылындағы мектептердің бірінде 7 жасар баланы жоғары сынып оқушылары бірнеше рет зорлап келген» деген ақпарат тараған болатын. Жеткіншектің әжесі құзырлы органдарға арызданғанымен, бұл жайтқа қатысты тергеу шаралары жүргізілмегенін айтып шағымданған еді.