Ауа райы
Астана 6 °С
Алматы 3 °С
валюта бағамы
USD 335.24
EUR 395.82
RUB 5.82
CNY 50.65

ОҚО-ның әкімі жазушы-драматург Тұрысовты мерейтойымен құттықтады

ОҚО-ның әкімі жазушы-драматург Тұрысовты мерейтойымен құттықтады
2017 жылғы 13 қазан 13:23 447

ШЫМКЕНТ. ҚазАқпарат - Оңтүстік Қазақстан облысының әкімі Жансейіт Түймебаев жазушы-драматург Еркінбек Тұрысовпен кездесті. Аймақ басшысы Қазақстанның еңбек сіңірген қайраткері, Халықаралық әдеби «Алаш» сыйлығының лауреаты болған қаламгерді 90 жасқа толған мерейтойымен құттықтады, деп хабарлайды ҚазАқпарат тілшісі.

Жазушы-драматург Еркінбек Тұрысов саналы ғұмырында «Оңтүстік Қазақстан» облысы газетінің әдеби қызметкері, бөлім меңгерушісі, меншікті тілшісі, аудандық «Алғабас» газетінің редакторы болды. Бүгінде 90 жасқа келіп отырған жазушы ұзақ жылдар мемлекеттік, қоғамдық қызмет атқара жүріп, туған жер, өскен өлке, замандастар өмірінен 600-ге жуық тарихи, көркем публицистикалық шығармалар жазып, ұлттық рухани мәдениетіміз бен әдебиетіміздің дамуына өлшеусіз үлес қосқан тұлға.

«Биылғы жылы сіздің 90 жылдық мерейтойыңызға орай облысымызда бірқатар іс-шаралар ұйымдастырылып отыр. Күні кеше ғана Бәйдібек ауданының Ақтас, М.Әуезов атындағы жалпы орта мектептерінде оқырмандар конференциялары, аудандық спорт кешенінде волейболдан турнир және шығармашылық кеш ұйымдастырылды. Бүгін Түркістан салтанат сарайында «Дәуір дастангері атты» шығармашылық кешіңіз өтпек. Сіз, ұлттық әдебиетіміздің көшбасындағы аға буын өкілдерінің бірісіз. Сондықтан сіздің шығармаларыңызды бүгінгі ұрпаққа насихаттап, оларды отансүйгіштікке тәрбиелеуіміз қажет», - деді Жансейіт Қансейітұлы.

Таяуда «Бір өлке - бір кітап» облыстық акциясы аясында қаламгердің «Темірлан» романын оқу таңдалды. Романда әлемге әйгілі Әмір Темірдің аяқталмаған ақырғы жорығы, бүгінгі Орта Азия мен Иран, Оңтүстік Қазақстан жерінде, бұдан алты ғасыр бұрын өткен оқиғалар жайында тарихи дерек, автор жиһангер падишахтың тұлғасын және қоршаған ортаның барша тіршілік-тынысын кең суреттейді.

Айта кетейік, қаламгер жазған «Келіншектау», «Ақбақай», «Қыран тауы», «Құралай жолы», «Түндер сазы», «Тұлпардың ізі», «Нұржаудың нұрлы түндері», «Темірлан», «Бәйдібек», «Шығыстың шың ұлдары», «Замана перзенттері», «Мәңгілік сарын» атты дүниелер - ұлттық әдебиетіміздің ұлағатты туындылары саналады. 2017 жылдың қыркүйек айында автордың екі томдық шығармалар жинағы «Қазығұрт» баспасынан жарыққа шықты.

Еркінбек Тұрысов сондай-ақ қазақ әдебиетін дамытуға сіңірген жемісті еңбегі үшін екі мәрте (1977-1987ж.ж.) Қазақстан Жоғары Кеңесінің Құрмет грамотасымен, «Құрмет» орденімен және «Республика Тәуелсіздігіне 20 жыл», «Оңтүстік Қазақстанға сіңірген еңбегі үшін» медальдарымен марапатталған. Қаламгерге «Оңтүстік Қазақстан облысының және Бәйдібек ауданының құрметті азаматы» атағы берілген.

 

 

Басты сөздер: Әкім, Оңтүстік Қазақстан облысы, Әдебиет, Мәдениет,
Қате таптыңыз ба? Белгілеп, CTRL+ENTER басыңыз

Пікір қалдыру

Соңғы Пiкiрлер