ОҚО-да жаз шыққалы 33 адамды қарақұрт шаққан

ШЫМКЕНТ. ҚазАқпарат - Оңтүстік Қазақстан облысында тұрғындарды қарақұрт шағу деректері жиілеп кетті. Жаз шыққалы бері өңірде 33 адамды осы жәндік шаққан, деп хабарлайды ҚазАқпарат ХАА тілшісі.

Облыстық жоғары қысымды оттегімен емдеу орталығы Икрам Толеевтің сөзінше, қарақұрттан зардап шеккендердің басым көпшілігі ер азаматтар. Ауруханаға шымкенттік тұрғындар жиі түсуде екен. Бүгінде ауыр жағдайда жеткізілген 6 жасар бала орталықтың жансақтау бөлімінде жатса, тағы 9 адамға тиісті ем-дом шаралары жүргізілген.

Сондықтан дәрігерлер тұрғындарға аулаларда не болмаса егістік алқаптарда жүргенде ашық-шашық киінбестен, аяқ киіммен жүруге кеңес береді. Мұндай сақтық шаралары өміріңізді аман алып қалуы мүмкін. Себебі, қарақұрттардың күн ысыған сайын уы күшейе түседі.