ОҚО-да « Worldskills Kazakstan - Жыл шебері 2017» чемпионаты басталды
Аймақтық чемпионатқа 35 колледжден 79 студент қатысты. Олар 9 мамандық бойынша өзара сынға түсіп, кәсіптік білім деңгейлерін көрсетті. Елімізде сұранысқа ие құрылысшы-монтаждаушылар мен дәнекерлеушілер, дизайнерлер мен аспаздар сияқты маман иелері тәжірибелік дайындығын, кәсіптік біліктілігін байқатты. Шәкірттер сондай-ақ шығармашылығы мен жоғары еңбек мәдениеті, заманауи технологияларды іс жүзінде қолдана алуы бойынша сыналды. Сала мамандары жастарды кәсіптік білімге баулу арқылы болашақта тәжірибелі мамандар даярлауға болатынын айтады. 
«Негізгі мақсат - жұмысшы мамандықтарының иммиджін көтеру. Балаларымызды осы жұмысшы мамандыққа алып келу. Себебі, қазіргі еңбек нарығында ең талап етілетіні ол кәсіптік техникалық білімі бар жұмысшы мамандықтары. Балалардың да күннен күнге қызығушылығы артып келеді».
Үш күнге созылған байқаудың жеңімпаздары халықаралық Worldskills чемпионатына қатысуға жолдама алып, әлемнің үздік тәжірибесін үйренуге қол жеткізеді.
Еске салайық, өткен жылғы чемпионат жеңімпаздары өз мамандықтарына сәйкес Түркия Ұлттық білім министрлігіне қарасты алдыңғы қатарлы жоғары оқу орындарына тегін білім алуға жолдама алған болатын. 