ОҚО-да үш айда 26 жасөспірім өз-өзіне қол салған
Ерлан Абаевтың мәліметінше, оңтүстік өңірінде жыл басынан бергі үш айда кәмелетке толмағандар арасында 26 суицид оқиғасы тіркелген.
«Орын алған 26 жағдайдың 12-сінде жасөспірімдер қайтыс болды. Әр оқиға бойынша Қылмыстық кодекстің 105-бабы 3-ші бөлігі (кәмелетке толмағанды өзін-өзі өлтіруге дейін жеткізу) бойынша іс қозғалып, сотқа дейінгі тергеп-тексерулердің бірыңғай тізіліміне тіркелді. Олардың ішінде 1 іс сотқа жолданса, 5-еуі қаралу сатысында. 19 іс қылмыс белгілері болмауына байланысты тоқтатылды», - деді ҚР Бас прокуратурасы Қылмыстық қудалау қызметінің бастығы.
Сондай-ақ, Бас прокуратураның мәліметінше, Шымкенттің іргесіндегі Қайнарбұлақ саяжайындағы 16 жасар жасөспірімнің суициді бойынша қаралған қылмыстық іс сотқа жолданған. Ал, 16 сәуірде 15 жасар жасөспірімнің өз-өзіне қол жұмсау дерегіне қатысты қылмыстық іс қозғалып, қаралуда. Өзге мәліметтер тергеу құпиялығына байланысты айтылмайды.