ОҚО-да ең үздік қазақ тілі пәнінің мұғалімдері анықталды

ШЫМКЕНТ. ҚазАқпарат - Оңтүстік Қазақстан Мақтарал ауданында «Ең үздік қазақ тілі пәнінің мұғалімі -2016» атты конкурс өтті. Аталмыш шара Қазақстан Тәуелсіздігінің 25 жылдығына арналды. Бұл туралы ҚазАқпарат аудан әкімдігінің баспасөз қызметіне сілтеме жасап хабарлайды.

Конкурсқа өзге тілде сыныптарда оқып жүрген балаларға сабақ беретін ұстаздар қатысты.

Конкурстың әділқазылар алқасының мүшелері ұстаздардың кәсіби біліктіліктерін, өздерін аудиторияда ұстай білу ерекшеліктерін, портфолио, оқу процесінде жаңа технологияларды тиімді пайдалана білу қабілеттерін бағалады.

Бірінші орынды әл-Фараби атындағы орта мектептің қазақ тілі пәнінің мұғалімі Нәсиба Қаландарова жеңіп алса, екінші орын М.Горкьий атындағы №1 мектеп-гимназиясының ұстазы Айнұр Холбаеваға бұйырды, үшінші орынға «Мырзакент» мектебінен келген мұғалім Ғалия Төреқұлова тұрақтады.

Байқау жеңімпазы мен жүлдегерлері арнайы дипломдармен және құнды сыйлықтармен марапатталды.