ОҚО әкімінің қатысуымен Шымкент қаласын көгалдандыру мәселесі талқыланды
Басқосуда тараптар Шымкент қаласын көгалдандыру жайын әңгімелеп, бірқатар жобалар бойынша пікір алмасты.
Атап айтқанда, корейлік кәсіпкер аймақ басшысына Өзбекстандағы декоративті ағаштар өсірумен айналысатын тұқымбағын таныстырып, ондағы жасыл желектерді баптаудың ерекшеліктерін баяндады. Шымкент қаласының климаттық жағдайын ескерген Жансейіт Қансейітұлы көшеттерді, алдымен, сынақ ретінде оңтүстік өңірде өсіріп көру керектігін айтты.
Сонымен қатар, Оңтүстік Қазақстанға сапары барысында корейлік бизнесмен Шымкент қаласында гольф клубын, жастар саябағын, декоративті ағаштарға арналған тұқымбақ құру және ескек есу спорты бойынша спорт кешенін салуды ұсынды.
Өз кезегінде, облыс әкімі аталған ұсыныстарды қарастыратынын, компанияның Өзбекстандағы тұқымбағының жасыл желектерін зерттеуге Оңтүстіктен арнайы делегаттарды жіберетінін жеткізді.
Еске салайық, таяуда облыс әкімі Шымкент қаласын көгалдандыру бойынша қала әкімдігіне сын-ескертпелер айтып, осы бағыттағы жұмыстарды жандандыру мақсатында бірқатар тапсырмалар берген болатын. Еліміздің үшінші мегаполисі саналатын Шымкенттің көгалдандыру жұмыстарына ерекше мән берген әкім бұл мәселені жеке бақылауына алып отыр.
Айта кету керек, кореялық «J&I Company Ltd» компаниясы нарықта 10 жылдан бері көгалдандыру саласында қызмет етіп келе жатқан серіктестік. Оңтүстік Корея мен Өзбекстанда сәтті жобаларын бастаған компания Қазақстанда да өз бизнесін дамытуды жоспарлап отыр.