19:14, 18 Қазан 2016 | GMT +6
Назарбаева НАТО өкілімен аймақтық тұрақтылық мәселелерін талқылады
АСТАНА. ҚазАқпарат - Парламент Сенаты Халықаралық қатынастар, қорғаныс және қауіпсіздік комитетінің төрайымы Дариға Назарбаева НАТО Бас хатшысының Орталық Азия және Кавказ жөніндегі Арнаулы өкілі Джеймс Аппатураймен кездесті.
Кездесуге сенаторлар Икрам Адырбеков және Мұхтар Алтынбаев қатысты, деп хабарлайды ҚазАқпарат.
Д.Назарбаева НАТО-мен әріптестікті дамыту Қазақстанның сыртқы саяси бағытындағы маңызды басымдығы екенін атап өтті.
Әңгіме барысында қорғаныс және қауіпсіздік саласындағы ұлттық әлеуетін нығайтуға, аймақтық тұрақтылыққа төнетін қатерлер мен қауіптерге қарсы іс-қимылға жәрдемдесетін Солтүстік Атлантика альянсының қазіргі кездегі бағдарламалары мен үздік тәжірибесін тартуға біздің ел мүдделі екені атап өтілді.
НАТО Бас хатшысының Арнаулы өкілі Қазақстан мен Солтүстік Атлантика альянсы арасындағы өзара іс-қимылды, еліміздің бітімгерлерінің дайындық деңгейін оң сипаттай отырып, Қазақстанның жаһандық дипломатиядағы рөлін жоғары бағалады.