Назарбаев Астана процесіне қатысушыларға үндеу жолдады

None
None
АСТАНА. ҚазАқпарат - Қазақстан Президенті Нұрсұлтан Назарбаев елордада басталған Сирия мәселесін реттеу жөніндегі халықаралық кездесуге (Астана процесі) қатысушыларға үндеу жолдады. 

Үндеуді келіссөздер барысында ҚР Сыртқы істер министрі Қайрат Әбдірахманов оқып берді, деп хабарлайды ҚазАқпарат.

«Сирия ахуалын реттеу жөніндегі келіссөздер қатысушыларына сәлем жолдаймын. Сирияда орын алған күрделі ахуал бүкіл әлемдік қоғамдастықтың назарын өзіне аударып отыр. Шамамен 6 жыл бойы жалғасып жатқан қантөгіс жанжал түрлі өркениет пен мәдениет тоғысқан қасиетті өлкеге қайғы-қасіреттен басқа ештеңе әкелмегендігін мойындауға мәжбүрміз. Қазақстан бейбітсүйгіш ел және БҰҰ Қауіпсіздік кеңесінің тұрақты емес мүшесі ретінде Таяу Шығыс өңіріндегі қауіпсіздік пен тұрақтылықтың орнап, беки түсуіне мүдделілік танытады», - деп атап өткен ҚР Президенті.

Мемлекет басшысы бүгінгі кездесу Сириядағы ахуалды бейбіт реттеуге бағытталған халықаралық қоғамдастық күш-жігерінің жарқын үлгісі саналатындығын баса айтып өтті.

«Қазақстан Сирия ахуалын шешудің жалғыз дұрыс жолы өзара сенім мен өзара түсіністікке негізделген келіссөздер болуы тиіс деп санайды. Еліміздің бүгінгі келіссөздерді өткізу орны ретінде таңдап алынуы да тосыннан емес. Өздеріңізге белгілі, 2015 жылы Астанада жекелеген сириялық оппозиялық топтар арасындағы келіссөздердің 2 раунды өтті.  Біз сириялық босқындардың бейнетін жеңілдету үшін 700 мың доллардан астам қаржы бөлдік, таяуда азық-түлік түріндегі 500  тонна гуманитарлық жүк жөнелттік. Астанадағы кездесу барлық мүдделі тараптардың БҰҰ қамқорлығындағы женевалық процесс аясында сириялық дағдарысты оңтайлы шешуді қамтамасыз ететіндігіне және  Сириядағы бейбітшілік пен тұрақтылықты орнату ісіне лайықты үлес қосатындығына сенім білдіремін. Нәтижелі және табысты келіссөздер тілеймін», - деді Назарбаев.

Соңғы жаңалықтар