Науырзым қорығындағы өртке қатысты қылмыстық іс қозғалды
Ведомстводан мәлім етілгендей, өрттің басталғаны туралы хабар Науырзым ауданы Қараменді ауылындағы өрт сөндіру бекетіне кеше сағат 17:34-те түскен.
«Ашық алқаптарда құрғақ шөпті өртеу жұмыстары жүргізілген. Бірақ, желдің жылдамдығы 19 м/с дейін жетіп, жалынды өршітіп жіберген. Бұл процесс адамдардың бақылауынан шығып кеткен. Өрт Ақбұлақ ауылынан Науырзым қорығына дейін жеткен. 19 сәуір күні сағат 02:10-да өрт толықтай сөндірілді. Дала өртін сөндіру жұмыстарына 128 адам, 26 арнайы техника қатыстырылды. Өрт аумағы 500 га құрады», - деді облыстық ТЖД баспасөз хатшысы Уәлихан Досанов.
Өрт орнында Қостанай облыстық ІІД жедел-із кесу тобы жұмыс істеп жатыр. Алдын ала мәлімет бойынша, өрт адамдардың абайсыздығынан болған. ҚР ҚК 292-бабы («Өрт қауіпсіздігі талаптарының бұзылуы») бойынша қылмыстық іс қозғалды.
Еске салсақ, төтенше жағдай кеше Науырзым ауданынан 15 шақырым жердегі Ақбұлақ ауылында болды. Салдарынан 500 га дала алқабы өртке оранды.