Мысырдағы қақтығыс: 50-ден астам әскери қаза тапты

АСТАНА. ҚазАқпарат - Сенбі күні Синай түбегінің солтүстігінде Мысыр қауіпсіздік күштеріне жасалған лаңкестер шабуылынан қаза тапқандар саны 50-ден асты, деп хабарлайды Euronews Рейтер агенттігіне сілтеме жасап.

Бұл оқиға, мамандардың айтуынша, Пирамидалар еліндегі экстремистердің ең ірі лаңкестік әрекеттерінің бірі болды.

Өлтірілгендердің қатарында арнайы жасақтың және Мысыр Ұлттық қауіпсіздік басқармасының қызметкерлері бар.

Қауіпсіздік қызметкерлері Каирден 130 шақырымда, құмды шөлде бұрын Мысырда болған терактілерге қатысы бар лаңкестік ұйымды жою операциясын жүргізіп жатқанда тұтқиылдан жасалған шабуылға тап болған.

Қазірде әскерилер мен полицияның біріккен күштері қақтығыс аймағын тазарту жұмыстарын жүргізіп жатыр.