Мемлекеттік хатшы Алматының бірқатар мәдени нысандарында болды
ҚР Мемлекеттік хатшысы Гүлшара Әбдіхалықова Алматы әкімімен бірге «Рухани жаңғыру» бағдарламасы аясында биылғы жылдың мамыр айында Қарағайлы скверінде 1931-1933 жылдарғы ашаршылық жылдарының құрбандарына орнатылған ескерткішке гүл шоқтарын қойды. Қола мен граниттен құйылған төрт метрлік монумент баласын кеудесіне қысқан ананы бейнелейді.Сонымен қатар Гүлшара Әбдіхалықова қаланың 1000 жылдығы мерекесі аясында ашылған Алматы Мұражайының экспозицияларымен танысты. Мұражай мегаполистің ірі ғылыми және мәдени орталығы болып табылады, мұнда өңірдің тарихи- мәдени мұрасының барлық спектрі көрініс тапқан. Мұражай коллекциясы 40 мыңға жуық экспонаттардан тұрады, олардың арасында көркемөнер шығармалары, қазақ этнографиясының құнды жиынтығы, түрлі дәуірдегі тұрмыстық заттар коллекциясы, нумизматика жəдігерлері бар.
ҚР Мемлекеттік хатшысы дәл осы күні «Қала күні» мен «Астана ЕХРО 2017» халықаралық көрмесіне орайластырылған халықаралық «Алматы Кок-Тобе Оpera - 2017» фестиваліне қатысады. Фестиваль сахнасында Абай атындағы мемлекеттік опера және балет театры симфониялық оркестрінің сүйемелдеуімен қазақстандық үздік солистер мен әлемдік опера және балет жұлдыздары өнер көрсетеді.
Бұдан өзге, Гүлшара Әбдіхалықова жаңартылған «Сұлушаш" панносының ашылу салтанатына қатысады. Суретші Молдахмет Кенбаев пен монументалист Николай Цивчинский жасаған қолына ұлттық зергерлік бұйымдарды таққан қыз бейнесі 70-ші жылдары Достық даңғылының бойындағы бір үйдің қабырғасына қойылған болатын. Суретшінің ұлы Алпамыс Кенбаевтың арқасында Алматы қаласыны әкімдігінің қолдауымен панно смальтадан қайта жасалып, Алматының ең көрікті жері- Көктөбеге қойылды.