08:22, 26 Қараша 2016 | GMT +6
Қызылорданың көрнекті жеріне Мұстафа Шоқай ескерткіші орнатылады
ҚЫЗЫЛОРДА. ҚазАқпарат - Облыстық бюджеттен бөлінген 49 млн. 346,0 мың теңгеге мемлекет және қоғам қайраткері Мұстафа Шоқайдың ескерткіші жасалынды, деп хабарлады ҚазАқпарат тілшісі қалалық әкімдікке сілтеме жасап.
Алып ескерткіштің биіктігі - 6 метр, бүгінгі күні ескерткіш орнатуға толық дайын тұр. Ескерткіш 3 натуралық өлшемде, қола материалынан құйылған. Авторы - Қазақстан Суретшілер одағының мүшесі, мүсінші Көшер Байғазиев.
Бүгінгі таңда Қызылорда қаласының орталығынан ескерткіштің орны белгіленіп, «Мұстафа Шоқай атындағы қоғамдық қордың» қаржысы есебінен биіктігі 6 метрді құрайтын гранит постаменттің құрылысы жүргізілуде.
Ескерткішті орнатуға Қазақстан Республикасында орнатылатын ескерткіштер мен монументтер жөніндегі Мемлекеттік комиссияның хаттамалық шешімімен келісім алынған.