Қызылордада Microsoft академиясы ашылады
Бұл туралы ҚР Үкіметінде өткен баспасөз мәслихатында Қызылорда облысының әкімі Қырымбек Көшербаев мәлімдеді.
«Сәуір айында Microsoft компаниясымен ынтымақтастық туралы меморандум бекіттік және шілде айынан бастап, онлайн-оқыту арқылы заманауи инженерлік-компьютерлік технологияларды қолданатын біліктілігі жоғары мамандарды дайындауды бастадық. Бірлескен ғылыми-зерттеу және тәжірибелік-эксперименттік жұмыстарды жүргізу үшін Қорқыт Ата атындағы Қызылорда мемлекеттік университеті базасында "Майкрософт академиясын" құру туралы уағдаластық", - деді өңір басшысы.
Әкімнің айтуынша, қазіргі уақытта облыста Machinе-Learning технологиясы арқылы күріш алқабының шығымын болжап, су тасқыны жағдайларын модельдеу бағыттары қолға алынды. Machinе-Learning - әлемде кеңінен қолданылатын Microsoft компаниясының өнімі.
"Одан бөлек, ЭКСПО аумағын қолдана отырып, Мәскеу болат және қорытпалар институтымен Қызылордада машина құрастыру, 3-D принтерінің көмегімен түйіндер мен детальдар өндіруге бағытталған мәскеулік ғылыми-зерттеу инжиниринг орталығының баламасын құру жөнінде келіссөздер жүргіздік», - деп толықтырды Қ. Көшербаев.
Айта кетейік, бүгін Қазақстан Республикасы Үкіметінде Елбасы Жолдауынан туындаған міндеттердің Қызылорда өңірінде орындалу барысына арналған баспасөз мәслихаты өтті. Басқосуда облыс әкімі Қырымбек Көшербаев аймақтың әлеуметтік-экономикалық дамуы мен алдағы жоспарлары туралы баяндады.