Қызылорда облысында 2500 адамға тұрғын үй салуға жер телімдері беріледі

ҚЫЗЫЛОРДА. ҚазАқпарат - Кеше Қызылорда облысының әкімі Қырымбек Көшербаев 20 шиелілік тұрғынға жеке тұрғын үй құрылысын жүргізу үшін жер телімдерінің құжаттарын тапсырды, деп хабарлады ҚазАқпарат ХАА тілшісі облыстық әкімдікке сілтеме жасап.

Жаңа «Береке» мөлтек ауданында 300, жалпы аудан бойынша 2500 адам жер телімдерін алады.

 

Өзінің алғысөзінде облыс әкімі Қырымбек Көшербаев елді мекендердің  экономикасы мен ауыл тұрғындарының өмір сүру деңгейін жақсарту жергілікті биліктің  алдағы уақытта да  бірінші кезектегі міндеті екенін  атап өтті.

 

«Бүгінде аймағымызды дамыту бойынша ауқымды  істер атқарылуда. Наурыз мерекесі қарсаңында облыс орталығында жаңа мөлтек аудан пайдалануға берілді. Бүгін 300-ге жуық Шиелі тұрғынына жеке тұрғын үй құрылысы үшін жер телімдері беріледі. Шиелі ауданында 7 мыңға жуық адам баспана салу үшін жердің кезегінде тұр. Енді тиісті инфрақұрылыммен қамтамасыз етілген аумақтан 2500 адамға жер телімдері берілетін болады»,- деді облыс әкімі.