Қостанайда өртеніп жатқан көпқабатты үйден 19 адам құтқарылды

ҚОСТАНАЙ. ҚазАқпарат - Қостанай қаласында өртенген тұрғын үйден 19 адам құтқарылды, деп хабарлайды ҚазАқпарат ҚР ІІМ Төтенше жағдайлар комитетінің баспасөз қызметіне сілтеме жасап.

Оқыс оқиға бүгін сағат 17:10-дер шамасында болды. Тілсіз жау Қостанайдағы көпқабатты тұрғын үйдің 5-қабатынан шыққан. Жалын 20 шаршы метр аумақты шарпыған.

«Өрт шыққан 5 қабатты үйден 19 адам оқшау аумаққа көшірілді. Оның ішінде 2 бала бар. Алдын ала болжам бойынша, төтенше оқиғаға темекі тұқылы себеп болған. Оқиғаның салдарынан 1970 жылы туған ер адамды күйік шалып, ауруханаға жеткізілді», - делінген ведомствоның баспасөз хабарламасында.

Айта кетейік, тұрғын үй өрті сағат 17:52-де толықтай сөндірілді. Оқиға орнында 9 өрт сөндіруші жұмыс істеді.