Көкшетауда қалалық саябақта ойран салғандар ұсталды
Ақмола облыстық ІІД баспасөз қызметінің мәліметі бойынша, ағымдағы жылдың 17 мамырында Көкшетау қалалық ІІБ жедел тергеу тобының қызметкерлері облыстық денсаулық сақтау басқармасының ғимараты мен Әуезов көшесінің бойындағы аллеядағы темір бағанда орнатылған 7 жарық шамының бүлінгенін анықтаған. Оның ішінде 2 жарық шамы бағанасымен бірге жұлып құлатылған. Оған қоса, Шахмет Құсайынов атындағы Ақмола облыстық Қазақ музыкалық драма театрының маңындағы сәулет мүсініне зақым келтірілген.
Жедел іздестіру шарасы барысында көп ұзамай бейнебақылау камерасының көмегімен күдіктілер - Солтүстік Қазақстан облысының тұрғындары қолға түсті. Олардың бірі Көкшетау қаласындағы ломбард қызметкері болса, үшеуі жұмыссыздар.
Қазіргі кезде күдіктілерден түсініктеме алынып, үстерінен ҚР ҚК 293-бабы (бұзақылық) бойынша қылмыстық іс қозғалды.