Көкшетау жастары латын әліпбиіне өз қолдауларын сурет салумен жеткізді
Облыстық білім басқармасы баспасөз қызметінің мәліметінше, орталық сабаяққа кіре берісте ұйымдастырылған шара барысында жастар арнайы модульдерге сурет салу арқылы Отанға деген махаббаттарын көрсетіп, қазақ тілі әліпбиінің кириллицадан латын графикасына көшірілуін қолдайтындықтарын білдірді.
Шараға ұйытқы болған - Ақмола облысының білім басқармасы және «Өнерпаз дарынды балалармен жұмыс жүргізу жөніндегі облыстық оқу-әдістемелік орталығы».
Білім басқармасы басшысының орынбасары Ботагөз Дүйсенова атап өткендей, шараның мақсаты - жасөспірімдер мен студент жастардың арасында көркемдік-эстетикалық құралдар арқылы азаматтылық пен патриоттылықты қалыптастыру. Сондай-ақ білім алушылардың көркемдік, шығармашылық қабілеттерін дамыту, рухани-адамгершілік және мәдени құндылықтарға тарту болып табылады.
Осы орайда, Көкшетау қаласы «Арна» колледжінің екінші курс студенті Жұлдызай Малғаждарова: «Латын әліпбиіне көшу - мемлекетіміздің болашаққа жасаған қадамы деп ойлаймын. Біз-Қазақстанның болашағымыз! Біз қазақ тілінің латын графикасына көшуін қолдаймыз. Менің ойымша, латын әліпбиіне көшу бізге және біздің балаларымызға ағылшын және басқа да тілдерді оңай үйренуге мүмкіндік береді», - деп пікірін білдірді.