ҚазҰУ ғалымдары робот гуманоидтің қозғалыс жүйесін ойлап тапты

АСТАНА. ҚазАқпарат - Әл-Фараби атындағы Қазақ ұлттық университеті жанындағы математика және механика ғылыми-зерттеу институтының жетекшісі, техника ғылымдарының кандидаты А.К. Ералиевтің жетекшілігімен ізденуші-ғалымдар қиын жерлерден еркін өтетін робот гуманоидтің қозғалыс жүйесін ойлап тапты, деп хабарлайды университеттің баспасөз қызметі «Ұлттық мемлекеттік ғылыми-техникалық сараптама орталығына» сілтеме жасап.

Ғылыми жұмысты қолға алғанда ҚазҰУ ғалымдары өтуге қиын жерлерді құлтемірдің қозғалысын басқарып, жоспарлайтын жаңа жүйені ойлап табуды көздеген еді. Сонымен қатар робот гуманоидтың табан бөлігімен еркін айналуына баса мән беріп, құлтемірдің еркіндік дәрежесі механизмінің әсері кең көлемде зерттелгенін айта кету керек. Мамандар робот гуманоидтың қозғалысын жетілдіріп, басқару жүйесін қалыптастыру кезінде пассивті динамика әдістерін қолданған. Сонымен қатар ғалымдар экологиялық жағдайларда робот гуманоидтың тиімді қозғалысын қамтамасыз ететін алгоритмдерді басқаруда жергілікті реактивті навигация пайдаланғанын да айта кету керек.

ҚазҰУ ғалымдары қол жеткізген басты жетістік - робот гуманоидтың энергияны үнемдеп, тегіс емес жерде қозғалуын қамтамасыз ететін аяқ-қолының механизмін дайындағаны.

Ғылыми-зерттеу жұмысы барысында робот денесінің жоғарғы және төменгі бөлігіндегі екі звеноларды қосып, ауырлық орталығын бақылайтын арнайы шешім жасалды. «Аяқтың ұшы», «төмен старт» жаңа қозғалыстарды жасауға мүмкіндік беріп отыр.

Құлтемірдің денесіндегі барлық звенолар мен тіректі звенолардың (қол, шынтақ, саусақтардың, аяқ басы, тізе) орнын сипаттайтын арнайы 242 матрица жазылған.