Қазақстанның басым бөлігінде тағы үш күн аяз болады
«Суық антициклон алдағы үш тәулікте Қазақстаннан кетпейді, сол себепті Республиканың көптеген облыстарында аяз әлі де сақтаады. Өткен тәулікте орталық, оңтүстік-шығыс және оңтүстік облыстардың кей жерлерінде ауа температурасы климаттық нормадан 3-8°С, ал солтүстік пен шығыста 10-18°С, қиыр шығыста 20-23°C төмен болды», - делінген хабарламада.
Республиканың батыс облыстарында оңтүстік-батыс тропосфералық ауа ағынының әсерінен Иран мен Қара теңіз аумағынан жылы ауа келіп, ауа температурасы 3-5°С-қа жоғарылады.
Батыс пен оңтүстікте 25-27 қаңтарда кей жерлерде болмашы боран мен жылдамдығы 15-20, екпіні 23-28 м/с болатын жел тұрады.
Үш облыста қатты желдің салдарынан ескерту жарияланды.
Қызылорда облысында 24 қаңтар күндіз, 25-27 қаңтарда тәулік бойы шығыстан, солтүстік-шығыстан жел тұрып, оның жылдамдығы кей жерлерде 18-23, екпіні 30 м/с болуы мүмкін.
Ақтөбе облысында 24-і күні күндіз, 25 қаңтарда тәулік бойы оңтүстік-шығыстан соққан желдің күші 18-23, кей жерлерде оның екпіні 30 м/с болуы ықтимал.
Оңтүстік Қазақстан облысында 25-27 қаңтар аралығында солтүстік-шығыстан соққан желдің күші кей жерлерде 18-23, екпіні 30 м/с болады деп күтілуде.