Қазақстанда РФ ІІМ арнайы өкілінің тағайындалуы қалыпты тәжірибе - ҚР СІМ

АСТАНА. ҚазАқпарат - Бүгін Орталық коммуникациялар қызметіндегі баспасөз мәслихатында ҚР Сыртқы істер министрінің орынбасары Роман Василенко Қазақстанда жақында Ресей ІІМ арнайы өкілінің тағайындалуына байланысты түсініктеме берді, деп хабарлайды ҚазАқпарат.

«Шын мәнінде осы тақырып айналасындағы дүрлікпені түсінбеймін. Бұл қалыпты, яғни кеңінен тараған тәжірибе. Түрлі арнайы органдардың өкілдері әрбір елдегі елшіліктер жанында жұмыс істейді және ҚР ІІМ өкілі Ресейде бар. Сондай-ақ өзге арнайы органдардың өкілдері шетелдегі біздің елшіліктер штатында ресми түрде жұмыс істеуде. Осы ретте ақылға қонымсыз пікір жасамауға шақырамын»,-деді Василенко тілшілер сауалына жауап беру кезінде.

Естеріңізге сала кетейік, 20 қазанда Қазақстандағы Ресей ІІМ өкілі тағайындалды. Осы ретте Қазақстан Республикасындағы Ресей Федерациясы Ішкі істер министрлігінің өкілетті өкілі қызметіне полиция полковнигі Гир Андрей Вон-Менович бекітілді.