Қазақстанда халықаралық ауыл туризмі жобасы жүзеге асырылмақ
«Бүгінгі күні біздің қауымдастық ауыл туризмін дамытуға бағытталған үлкен халықаралық жобаға қатысып жатыр. Осыдан не бәрі екі апта бұрын ғана біз Алматы мен Жамбыл облыстарына барып, аталған жобаға қызықты боларлық орын таңдап қайттық», - деді ол.
Қауымдастық вице-президентінің айтуынша, жобаны жүзеге асыратын орын ретінде Алматы түбіндегі ЮНЕСКО қамқорлығына алынған Таңбалы тас мекені таңдап алынған.
«Ол өте қызықты орын болғанымен бүгінгі күні ешқандай инфрақұрылымы жоқ. Жергілікті адамдар да, шетелдіктер де оған барынша қызығушылық танытады. Өйткені, ондай орын әлемде өте аз. Біз сол жерде ауыл туризмін дамытқымыз келеді. Мәселе ауыл үйлерін ашу төңірегінде болып отыр. Ол қолға алынса тақау маңдағы ауыл тұрғындарына туризммен ақша табуға жақсы мүмкіндік болар еді», - деді Сергеенкова.
Оның сөзіне қарағанда, туристерге арналған үйлердің стандарттары қазіргі уақытта жасалып жатыр.
«Бастапқыда 10-15 үйді қамтуды есепке алып отырмыз. Қазіргі уақытта дайындық жұмыстары жүргізілуде. Жоба үш жылға, атап айтқанда 2017, 2018, 2019 жылдарға есептелінген. Жоба қолға алынды. Дегенмен, өздеріңізде инфрақұрылым, мәселен қарапайым жолдың өзі болмаса ештеңенің де жасалмайтындығын жақсы түсінесіздер. Ағымдағы жылы Таңбалыға дейінгі жол жөнделетін болады», - деді ол.