Қазақстанда әскери телеарна құру ұсынылды
«Еліміздегі әскери тәрбие жүйесін жақсарту және жетілдіру, әскери тәртіпті нығайту мақсатында 1993 жылғы 19 қаңтарда «Қазақстан Республикасының Қарулы Күштерiнде командирлердiң (бастықтардың) тәрбие және әлеуметтiк-құқықтық жұмыс жөнiндегi орынбасарларының институтын құру туралы» ел Президентiнiң N1084 Жарлығы қабылданды. Елбасы Жарлығына сәйкес, «ТӘҚЖ бойынша орынбасарлар институты» бастапқыда Қорғаныс министрлігі орталық аппаратынан бастап, барлық буындарға дейін енгізілді. Алайда кейін бұл сала өзгеріске ұшырап, Қарулы Күштерде аталған жұмыс Бас штабқа жүктелген. Осының нәтижесінде, бұнымен ҚР ҚК Бас штабының Тәрбие және идеологиялық жұмыстар департаменті айналысып келеді. Жарлық ережесі толыққанды орындалуы мақсатында тәрбие және әлеуметтiк-құқықтық жұмыс деңгейін көтеріп, жеке құрамның моральдық-психологиялық ахуалы мен әскери тәртіпті нығайту керек. Бұл ретте Қорғаныс министрлігінде тәрбие және әлеуметтiк-құқықтық жұмыс жөніндегі орынбасары лауазымын қайта қалпына келтіруді ұсынамын», - деп атап өтті депутат Мәжілістің жалпы отырысында.
Бұдан бөлек Б. Смағұлдың депутаттық сауалында жеке әскери телеарна құру бастамасын қарастыру ұсынысы да қамтылған.
Оның пайымынша, бүгінде экшн стиліндегі отандық толық метражды көркем фильмдер, ҚР ҚК басқа да әскерлер мен әскери құрылымдары туралы оқу, деректі, ғылыми-танымдық, ағарту фильмдерді жасап шығару бойынша белсенді әрекеттер жоқ.
Мұнымен қоса ол Елбасы жариялаған «Рухани жаңғыру» бағдарламасындағы бастаманы үлгі ете отырып, тәуелсіз Қазақстанның Отан қорғаушыларының қаһармандығы мен жетістіктерін көрсетіп, қоғам арасында насихаттайтын «Әскердегі 100 жаңа есім» жобасын өткізу бастамасын көтерді.