Қазақстан мен Мажарстан бірлескен ЖОО гранттарын көбейтті
Қ.Әбдірахмановтың хабарлауынша, тараптар бірлескен білім гранттарының санын көбейтуге қол жеткізді.
«Арадағы ынтымақтастықтың басым бағыттарының бірі - білім беру. Биылғы наурыз айында қол қойылған хаттама екі елдің ЖОО-ларындағы бірлескен гранттар көлемін 45-тен 200-ге дейін арттыруға мүмкіндік берді. Бұл шешім үшін мажарстандық тарапқа алғыс білдіреміз. Қазіргі уақытта Қазақстан-Мажарстан экономикалық ынтымақтастық бойынша үкіметаралық комиссиясының, Қазақстан-Мажарстан іскерлік кеңесінің және елордамыздағы мажарстандық сауда үйі әлеуетін пайдалану қажеттігіне ерекше назар аударып отырмыз», - деді ҚР СІМ басшысы.
Өз кезегінде, Петер Сийярто өз елінің Орталық Азия аймағында ынтымақтастық орнатқысы келетінін жеткізді.
«Менің мұнда келуімнің басты себебі - Мажарстан 1 шілдеден бастап, құрамына Польша, Чехия, Словакия және Мажарстан кіретін орталық-шығыс одағына басшылық етеді. Бұл аралықта Орталық Еуропа мен Орталық Азия арасында тығыз ынтымақтастық орнатқымыз келеді, - деді ол. - Біздің ойымызша, Орталық Еуропа мен Орталық Азия арасында орнаған тығыз ынтымақтастық екі аймаққа да пайдасын тигізеді. Құрлықтың батыс және шығыс бөлігі тығыз қарым-қатынас орнатқанда ғана, Еуропа өзінің бәсекеге қабілеттілігін қайтара алады».
Мажарстан - Қазақстанның маңызды сауда-экономикалық серіктесі. Екі ел арасында Қазақстан-Мажарстан стратегиялық кеңесі, Қазақстан-Мажарстан экономикалық ынтымақтастық бойынша үкіметаралық комиссиясы, Іскерлік кеңес және Қазақстан-Мажарстан тікелей инвестициялар қоры жұмыс істейді.