Қазақстан мен Корея әскери ынтымақтастықты жетілдірмек
Генерал-майор Талғат Мұхтаровтың айтуынша, қауіпсіздік саласында қалыптасқан бүгінгі жағдай мемлекеттердің өзара ынтымақтастығын жетілдіруді қажет етіп отыр.
«Достас мемлекеттердің қазіргі заманғы қауіп-қатерлерді уақытында ескертіп, оларға дер кезінде шара қолдану мақсатында тығыз қарым-қатынаста болуы маңызды. Бұл ретте біз Астанадағы Корея елшілігнен әскери атташенің ашылуын қолдаймыз. Біз кореялық серіктестеріміздің бұл қадамын қорғаныс саласындағы екіжақты қарым-қатынастарды жетілдіруге деген ұмтылысы деп бағалаймыз. Мен осы қадамның біздің мемлекеттеріміздің ынтымақтастығының жаңа кезеңі болатындығына сенімдімін»,-деді Мұхтаров.
Кездесу барысында екі елдің әскери ынтымақтастығының басым бағыттары сөз болды. Олардың арасында әскери дайындық жүйесін жетілдіру жұмыстары аясындағы әскери білім беру, қорғаныс өнеркәсібі кешенін дамыту мен қару-жарақ және әскери техникаларды жаңғыртумен айналысатын бірлескен кәсіпорындар құру сияқты мәселелер бар.