Қазақстан Елшісі тәжік министрін елордада өтетін халықаралық форумға шақырды
Қазақстан Елшілігі баспасөз қызметінің ақпаратына сәйкес, кездесу барысында Тәжікстан мен Қазақстанның су-энергетика саласындағы екіжақты және көпжақты ықпалдастықтығының өзекті мәселелері талқыланды.
«Қазақстан Елшісі сұхбаттасына 2017 жылғы 11-14 маусымда Астана қаласында өтетін Тұрақты даму энергетикасы жөніндегі 8-ші халықаралық форумына қатысу үшін Қазақстан Республикасының Энергетика министрі Қ.Бозымбаевтың шақыруын табыс етті. Нұрлан Сейтімов аталған іс-шараны «Болашақ энергиясы» ЭКСПО-2017 Халықаралық мамандандырылған көрмесі аясында ҚР Үкіметі БҰҰ аймақтық комиссияларымен және өзге де халықаралық ұйымдармен бірлесіп өткізетіндігін хабардар етті», - делінген ақпаратта.
Сұхбат соңында қазақстандық дипломат Усмонали Усмонзодаға кездесу үшін алғысын білдіріп, Қазақстан-Тәжікстан қарым-қатынастарын стратегиялық әріптестік рухында нығайту ісіндегі жемісті ынтымақтастыққа дайындығын жеткізді.