Қазақстан аумағында жолда қалған 338 адам құтқарылды
Бұл туралы ҚР ІІМ ТЖК ресми өкілі Руслан Иманқұлов мәлім етті, деп хабарлайды ҚазАқпарат.
«Самара-Шымкент» жолының 1052 шақырымындағы Ақтөбе облысы Ырғыз ауданы аумағында техникалық ақауына байланысты тұрып қалған автобустың 53 жолаушысы (4 бала бар) жылыту бекетіне жеткізілді. Жолаушылар автобусы Шымкенттен Уфаға бағыт алған. Жолаушылардың 47-сі Өзбекстан азаматы, алтауы - ресейлік. Ал 3 жүргізуші Қазақстан азаматтары.
Бұдан бөлек, «Астана-Петропавл» автожолының 54 шақырымында, яғни Ақмола облысы Шортанды ауданы аумағында жолда қалған автобустың 41 жолаушысы (2 бала бар) «Бозайғыр» елді мекеніне жеткізілді. «Петропавл-Сарыағаш» бағытындағы бұл автобустың жолаушылары Өзбекстанның азаматтары және екі жүргізуші Қазақстан азаматтары.
Ақмола облысы Бұланды ауданында «Мерке-Түмен» бағытындағы жолаушылар автобусы техникалық ақаулары салдарынан жолда тоқтап қалған. Көліктегі 57 адам Макинск қаласына жеткізілді. Жолаушылардың барлығы Тәжікстан азаматтары.
Ал Целиноград ауданы аумағында «Алматы-Екатеринбург» жолының 1275 шақырымында жолда қалған автобустың 15 жолаушысы, оның ішінде 5 бала Семенов орта мектебіне жеткізілді. Бұл адамдардың барлығы Қырғызстан азаматтары екені анықталды. Автобус жөнделгеннен кейін, қайтадан жолға шықты.
Бурабай ауданында «Көкшетау-Щучинск» жолының бекетінен жергілікті полиция қызметінің сүйемелдеуімен Көкшетауға дейін 2 жолаушылар автобусы жеткізілді. Жолаушылар көліктері «Сарыағаш-Екатеринбург» бағытында жүрген. Салонда болған Өзбекстанның 50 азаматына қажетті көмек көрсетілді.
Сонымен қатар «Астана-Омбы» бағдарындағы автобуста болған ресейлік 20 адам Көкшетаудағы қонақ үйлердің біріне орналастырылды.
Мұнымен қоса, Целиноград ауданында «Алматы-Екатеринбург» жолының 1 304 шақырымында қалған үш автокөліктегі 13 адам жылыту орындарына жеткізілді.
Бұдан бөлек, Қорғалжын ауданы аумағындағы жолда көліктері тұрып қалған 20 жолаушының 11-і Қорғалжын елді мекеніндегі қонақ үйге, ал қалған 9 адам сол жердегі туыстарының үйлеріне орналастырылды. Зардап шеккендер жоқ.