Қазақстан әскери қуаты бойынша әлем рейтингінде 50-орынға көтерілді

АСТАНА. ҚазАқпарат - Global Firepower Index жыл сайын жариялайтын рейтингінде Қазақстан әскери қуаты жағынан 50-орынға көтерілді, деп хабарлайды «ҚазАқпарат» ХАА.

Былтыр Қазақстанның Қарулы Күштері 53-орында болған.

Әлемнің қуатты армияларының 2018 жылғы тізімінде Қазақстан Сириядан (49-орын) кейін, Эфиопияның (51-орын) алдында тұр.

Бірінші орынды АҚШ иеленсе, екінші орында Ресей келеді, ал үздік үштікті  Қытай түйіндейді.

Ресейден тыс, ТМД елдерінің арасында Қазақстанның алдында Украина (29-орын), Өзбекстан (39-орын) және Беларусь (41-орын) тұр.

Рейтингте жалпы 136 мемлекет бар. Global Firepower осы рейтингті 55 параметр негізінде құрастырады.