Қаза тапқан курсант пен оның өліміне күдікті бір топта оқыған - Петропавл
Әскери институттың бастығы Серікхан Әбселемовтің ақпараты бойынша, екеуі де жақсы курсант болған. «Кеше түстен кейінгі жеке уақытта 3-курстың екі курсанты арасында жанжал туындаған. Алған пышақ жарақаты салдарынан курсант Тұрсын қаза тапты. Күдікті оқшаулағышқа қамалды, тергеу тобы жұмыс істеп жатыр. Барлық тергеу іс-шаралары аяқталғаннан кейін сәйкес шара қолданылады. Курсанттар бір топта білім алған. Екеуінің арасында айтарлықтай жанжал болмаған. Екеуі де тек жақсы қырынан көрініп жүрді. Күдікті - спортшы», - деді Серікхан Әбселемов.
Әскери институттың аумағында күшейтілген бақылау енгізілді. Сабақтар кесте бойынша жүргізіліп жатыр.
СҚО ІІД баспасөз қызметі хабарлағандай, оқиға фактісі бойынша ҚР ҚК 99-бабы «Адам өлтіру» бойынша сотқа дейінгі тергеу жұмыстары басталды. Күдікті - 19 жастағы институт курсанты ұсталып, Петропавл қалалық уақытша ұстау оқшаулағышына қамалды. Материалдар әскери-тергеу басқармасына берілді.