Каспийдің даулы мәселелері келіссөздер арқылы шешілуі керек - сарапшылар
Іс-шараның модераторы болған «Каспий-Еуразия» орталығының басшысы Андрей Сызранов атап өткендей, Каспий өңірі көмірсутек қорына бай және геосаяси және геостратегиялық қырынан ерекше болғандықтан, бірқатар өңірден тыс ойыншылардың назарын өзіне аударуда.
Сондай-ақ Сызранов «әрбір тараптың өз қызығушылығы бар, Каспийдің біздің ортақ үйіміз екендігін ұмытпауымыз керек және көршілердің мүддесі - өңірден тыс державалардың сойылын соқпауы маңызды» екендігін атап өтті.
«Дөңгелек үстел аясында талқыланып жатқан тақырыптар Каспий маңы елдері үшін өзекті болып табылады. Мұндай алаңдар өзара қарым-қатынасты нығайтуға негіз болады, сондай-ақ барлық тарапқа тиімді шешім қабылдауға әсер етеді», - деп өз ойымен бөлісті ресейлік сарапшы Ренат Қалиев.
Қазақстандық сарапшы, «Альтернатива» өзекті зерттеу орталығының директоры Андрей Чеботарев Каспий маңы елдерінің ынтымақтастығын нығайту керектігін атап өтті.
«Каспийді айнала қоныстанған 5 елдің ынтымақтастығы әлсіз. Каспий мәселесі бойынша түрлі сұрақтар жан-жақты талқылауды қажет етеді. Сириядағы шиеленіс, Таяу Шығыста терроризм мен экстремизмнің өршу мүмкіндігі аталған аумақтағы елдердің ынтымақтастығын нығайту мәселесін өзектендіре түсті», - деді сарапшы.
Жиында сарапшылар Каспий өңіріндегі саясат, экономика және қауіпсіздік мәселелері бойынша келісілген әрекеттер мен шараларды әзірлеу қажет деген байламға келді.