Каспий суының қызылға боялу себебі анықталды
Бұл туралы Маңғыстау облыстық экология департаменті басшысының орынбасары Руслан Түкенов айтты.
Оның айтуынша, зерттеу-сараптама бөлімінің мамандары теңіз суы және балдыр сынамасын алып, қазір талдау жұмыстарын жүргізіп жатыр.
«Қызыл балдырдың суға қызыл рең беріп тұрғаны оңай байқалады. Түсі өзгерген су көлемі қаланың 1-ші шағын ауданында орналасқан «Шағала» қонақүйінен Приморский тұрғын үй аумағына дейін 2 шақырымға созылады. Одан келер ешқандай қауіп жоқ. Кәдімгі табиғи құбылыс. Дауыл тұрған кезде қызыл балдыр жағаға жиналады»,-деді Руслан Түкенов.
Қызыл балдырлар теңіздерде су асты жартастарына, рифтерге, үлкенді-кішілі домалақ, қиыршық тастарға, құмға, ал майда түрлері ірі балдырларға жабысып өседі.
Негізінен 20 - 40 м, ал қолайлы жағдайларда 100 - 200 м тереңдікте өседі. Кейбір түрлері ғана тұщы суларда кездеседі. 2 класқа (бангия, флоридия), 600-ден асатын туысқа жататын 4 мыңнан астам түрлері бар.
Каспий теңізінде қызыл балдырдың 25 түрі кездеседі.
Еске сала кетейік, бұған дейін Ақтауда теңіз қызыл түске боялғандығы туралы бұған дейін хабарлаған болатынбыз.