Ауа райы
Астана 20 °С
Алматы 24 °С
валюта бағамы
USD 332.80
EUR 390.57
RUB 5.60
CNY 49.88

Қаражал мен Жәйремнің ауыз су мәселесі алдағы екі жылда шешілмек

Қаражал мен Жәйремнің ауыз су мәселесі алдағы екі жылда шешілмек
2017 жылғы 12 тамыз 09:19 389

 АСТАНА. ҚазАқпарат - Қаражал мен Жәйрем елді мекендерінің ауыз суға қатысты күрмеулі мәселелері алдағы екі жылдың ішінде шешімін таппақ. 

Бұл жайлы Қарағанды облысы әкімінің орынбасары Анатолий Шкарупа Қаражал қаласы мен Жәйрем кентінің тұрғындарымен өткен актив барысында мәлімдеді.

Аймақ басшысының орынбасары облыс әкімі және жергілікті тұрғындар алдында алдағы жұмыс жоспарлары жайлы есеп берді, деп хабарлайды өңір әкімдігінің ресми сайты

Қарағанды облысының әкімі Ерлан Қошанов 9 тамызда Қаражал қаласы және Жәйрем кентіне жұмыс сапарымен барып қайтқан болатын. Бұл елді мекендердің басты проблемасы ауыз судың тапшылығымен байланысты. Алайда жиынға бас қосқан ақсақалдар тек бұл мәселемен қоса басқа да қиындықтарға қатысты шағымдарын жеткізді. Олар онсыз да тапшы ауыз сумен бақшадағы көкөніс, жемістерін суару тіршілік нәрін қорлаумен бірдей деді. Қаражал мен Жәйрем тұрғындары облыс басшылығын шаруашылық қажеттіліктерге керекті техникалық суды жеткізу мәселесін шешіп беруді өтінді. 

Бүгінгі таңда Қаражал қаласы мен Жәйрем кентінде жалпы есептегенде 18 мыңға жуық адам тұрады. Тұрғындарға ауыз су Ащылы және Тұзкөл кен орындарының жер асты суынан тартылады. Алайда су құбырлары тым ескі, бұл негізгі проблема. Осыған дейін тұрғындарға ауыз су кесте бойынша аптасына екі рет, тәулігіне 1,5 сағаттан көп емес уақыт аралағында жіберілетін. Су сорғысын жөндеуден өткізген соң су тарату уақыты Қаражал қаласының тұрғындары үшін тәулігіне 12 сағатқа дейін, ал жәйремдіктерге 13 сағатқа ұзартылды. 
2007-ші жылы құрылысы басталған Тұзкөл су бөгеті осы күнге дейін іске қосылмаған. Жөндеу, орнату жұмыстары 2012-ші жылдың қарашасында аяқталған, алайда гидравликалық зерттемелер жүргізілгенде су таратқышта жарылыстар анықталған. 
Ауыз су тапшылығын толықтай шешу үшін Қарағанды облыстық әкімдігі «КазЦинк» АҚ-мен 15 шақырым пластик құбырлар беру туралы келісім жасаған. Сонымен қатар биылғы жылы Аймақтарды дамыту мемлекеттік бағдарламасы шеңберінде Жәйрем кентінде жалпы сомасы 900 млн теңгені құрайтын су құбырларын жөндеу жұмыстары басталған. Ол жұмыстар 2018-ші жылы аяқталуы тиіс, деп мәлімдеді Қарағанды облысы әкімінің орынбасары Анатолий Шкарупа.

Сондай-ақ жоспарда «Қаражал-Жәйрем» су таратқышын қайта қалыпқа келтіру тұр. Бұл жоба республикалық бюджеттен қаржыландырылуы үшін жария етілген. Алайда оны осы жылдан бастап кету көзделіп отыр. Нәтижесінде 2020-шы жылға қарай Қаражал және Жәйрем елді мекендерінде сумен қамту сапалы, әрі толыққанды болуы тиіс.

 

 

Басты сөздер: Қарағанды облысы, Әкімдік,
Қате таптыңыз ба? Белгілеп, CTRL+ENTER басыңыз

Пікір қалдыру

Соңғы Пiкiрлер