Қарағанды облысында депутаттардың сайлауына 800 мың теңгеден астам қаражат жұмсалды

ҚАРАҒАНДЫ. ҚазАқпарат - Қарағанды облысына жұмыс сапарымен ҚР Орталық сайлау комиссиясының мүшесі Константин Петров барды, деп хабарлайды ҚазАқпарат ОСК баспасөз қызметіне сілтеме жасап.

Өңірге сапардың мақсаты - мәслихат депутаттарын сайлау бойынша сайлау науқанының барысымен танысу болды.

ОСК ақпаратына сәйкес, 7 бос орынға 21 адам үміткер ретінде тіркелген. Жеті округте сайлаушылар саны 69 мың адам. Сайлауды ұйымдастыруға 33 учаске, 7 аймақтық және 4 аумақтық сайлау комиссиялары жұмылдырылды.

Қазір үгіт-насихаттау кезеңі.

Облыстық мәслихаттарға тіркелген әрбір кандидатқа бюджеттен үгіт-насихат шараларына, көлік шығыстарына 280 мың теңге, қалалық және аудандық мәслихаттардың депутаттығына кандидаттарға - 165 мың теңге бөлінеді.

«Сайлаушылармен кездесу өткізуге, түрлі үгіт-насихат материалдарын дайындауға бюджеттен осы мақсатқа бөлінген қаражаттың 820 мың теңгесі жұмсалды», - делінген хабарламада.

Сапар барысында Петров Қарағандыда бірқатар округтер мен учаскелерге, соның ішінде Қаражал қаласы Жарем кентіне барды. Облыстық аумақтық, аймақтық, учаскелік сайлау комиссиялары мүшелерімен танысып, олардың сауалдарына жауап берді.