Қапшағай қаласының əкімі БАҚ өкілдерін құттықтады
Шара барысында мереке иелері Қапшағай қаласының аумағында жүзеге асып жатқан бірқатар жобалармен танысты. Соның ішінде баламалы қуат көздерін өндіруге арналған бірегей кешен де бар. Күн электрстанциясының қуаттылығы 2 МВт. Болашақта күн нұрына бай өлкеде қуаттылықты 200мвт-қа дейін жеткізу жоспарлануда. Бұл кезең-кезеңмен жүзеге асатын болады. Сондай-ақ шаһар басшылығы журналистерді Қапшағай көлімен кемемен қыдыртты. Бүгінде бұл аймақта туризм саласы қарқынды дамуда. 150-ге жуық демалыс орындары жұмыс істеп тұр. Былтыр 325 мыңнан астам турист көлдің жағасында демалған. Оларға 345 млн теңгенің қызметі көрсетілген.
"Биыл демалушылардың саны екі есеге артады деген үміттеміз. Қазір Алматы-Талдықорған тас жолы жасалды. Шомылу маусымы басталғаннан бері келушілердің қарасы қалың", - дейді қалалық туризм жəне спорт бөлімінің басшысы Наталья Носова.
Қазір Қапшағайда қарапайым халыққа арналған қалалық жағажай жасалып жатыр.
"Жағажай заман талабына сай болады. Ол жерде жарықтандырылған жол, жуынатын, киінетін жерлер сияқты көптеген дүниелер қарастырылған. Қазір екі жағажайдың құрылысы жүріп жатыр", - деді Н. Носова. Ал жобаға сəйкес болашақта олардың саны бесеуге дейін жетеді.