Google экстремистік видеолардың YouTube-те таратылуына қарсы күресті күшейтпек

АСТАНА. ҚазАқпарат - Alphabet холдингіне кіретін америкалық Google компаниясы YouTube интернет-сервисіндегі экстремистік видеолардың таратылуына қарсы күресті күшейтуде. Бұл туралы жексенбі күні Маунтин-Вьюдағы компанияның штаб-пәтерінде (Калифорния штаты) жарияланған мәлімдемеде айтылған, деп хабарлайды ТАСС.

Google компаниясы мәлімдегендей, корпорация жуық арада терроризм мен басқа да экстремистік мазмұндағы видеоларды автоматты түрде анықтап, өзі өшіріп отыратын құралды жаңартып, оның жұмысын жақсартады. Сондай-ақ, компания мұндай таспаларды іздеп, оларды өшіріп отыратын қызметкерлер санын арттыруды көздеп отыр.

Бұдан бөлек, Google интернеттегі экстремистік материалдардың таратылуымен күресін қоғамдық ұйымдармен ынтымақтастықты жандандырмақ ниетте.