Гонконгтан келген келіншек 100 мың доллармен ұсталды
23 қыркүйек күні Алматының халықаралық әуежайының VIP залындағы кедендік бақылау «Гонконг-Алматы» бағытындағы №930 әуе рейсімен ұшып келген жолаушылардың қол жүгін тексеру барысында Алматы қалалық Мемлекеттік кірістер департаменті экономикалық тергеу қызметі мен «Жетісу» кедендік бекетінің қызметкерлері ҚР азаматшасын ұстады.
Жолаушының қол жүгінде 100 000 АҚШ доллары көлемінде декларацияда көрсетілмеген қаражат шықты. Аталған оқиға ҚР Қаржы министрлігі МК департаментінің сотқа дейінгі бірыңғай тергеу тізіліміне тіркелді. Жеке тұлғалардың кедендік одақ шекарасынан қолма-қол қаражатты алып жүру келісіміне сәйкес, шекарадан алып өтетін қолма-қол ақша 10 мың АҚШ долларынан аспауы тиіс.
Сонымен бірге, жоғарыда көрсетілген норманы бұзғаны үшін ҚР Қылмыстық кодексінде 3 мың АЕК көлеміндегі айыппұл немесе үш жылға дейінгі бас бостандығынан айыру немесе мүлкін тәркілеп, бас бостандығынан айыру түрінде жаза қарастырылған.