Франкфуртте «Астана» халықаралық қаржы орталығының таныстырылымы өтті
АХҚО басқарушысы Қайрат Келімбетов Германияның қаржылық орталығында өтіп жатқан Euro Finance Week халықаралық конференциясында қаржы орталығы қызметінің бағыттары және болашағы туралы айтып берді.
«Астана Орталық Азия мен ТМД-дағы халықаралық қаржы орталығына айналуға ұмтылуы қажет. Бар назарын капиал нарықтары, активтерді басқару, жеке банктер, қаржылық қызмет саласындағы технологиялық жобалар, исламдық қаржыландыру және «жасыл қаржы» сынды бірқатар стратегиялық бағыттардың дамуына аударғаны жөн», - деді Келімбетов.
Сонымен бірге, Келімбетов АХҚО базасында Қазақстандағы жаппай жекешелендіру бағдарламасында шешуші рөл атқаратын Астана халықаралық биржасының құрылатынын хабарлады.
«Іс жүзінде биржа мемлекеттік компанияларды, оның ішінде ұлттық мұнай-газ компанияларын, темір жол мен пошталық желі операторларын, әуе тасымалдаушы мен электр қуатын өндірушілерді және әлемдегі ірі уран өндірушіні жекешелендіру бағдарламасына тұғырнама болады», - деп атап өтті АХҚО басшысы.
Келімбетовтің айтуынша, «Жоғары ішкі құны бар сапалы активтер стратегиялық және қаржылық инвесторлардың қызығушылықтарын тудырады».
«Көршілес елдердің ірі капитал иелері де АХҚО өзге ықтимал клиенттері болмақ, себебі ол жаққа Батыс банктері қатаң нормативтік талаптар мен санкцияларға байланысты кіре алмайды», - деді ол.
Өз кезегінде, Қазақстанның Германиядағы елшісі Болат Нүсіпов қонақтарды елімізде «100 нақты қадам» Ұлт жоспары мен «Қазақстанның үшінші жаңғыруы» аясында жүріп жатқан саяси және әлеуметтік-экономикалық реформалармен таныстырды.
«АХҚО құрылуы көпжақты ынтымақтастыққа, қарқынды өсу мен өңірлік қаржы орталықтарының бірігуіне септігін тигізеді», - деп атап өтті қазақстандық дипломат.
Конференцияда Rothschild банкінің бақылау кеңесінің төрағасы Клаус Мангольд сөз сөйлеп, Қазақстанның табыстарына және экономикалық әртараптандыру бойынша жүзеге асырылып жатқан реформалар әлеуетіне жоғары баға берді.
Оның айтуынша, жаһандық дағдарысқа қарамастан Қазақстан экономиканың тұрақты өсімін сақтап қалды және елдің жан-жақты жаңғыруының жаңа саяси бағытын белгіледі.