ФИФА жылдың үздік футболшысына үміткер үш спортшыны атады

АСТАНА. ҚазАқпарат - Халықаралық футбол федерациясының (ФИФА) нұсқасы бойынша 2016 жылдың ең үздік футболшысы атағына үміткер ойыншылардың үштігіне аргентиналық Лионель Месси, португалиялық Криштиану Роналду және француз Антуан Гризманн кіріп отыр.

Бұл туралы ұйымның сайтында хабарланды.

Жеңімпаздың аты-жөні  Швейцарияда Цюрих қаласында 9 қаңтарда болатын  салтанатты рәсім барысында  жарияланбақ.

Месси «Барселона»  құрамында Испания чемпионатында және кубогында жеңімпаз атанды. Аргентиналық болса, ұлттық құрама сапында Америка Кубогының финалына дейін жетті. Бұл жерде айта кетер жайт, финалдық матчта чилиліктер басым түскен болатын.

Ал «Реал» шабуылшысы Роналду Чемпиондар лигасында мерейі үстем болды.  Сондай-ақ, Португалия құрамасында ойнап, шешуші матчта турнир қожайыны Франция командасын жеңіп,  Еуропа чемпионы атанды.

Гризманн еуропалық біріншілікте  қақпаға ең көп гол соққан шабуылшы атанған болатын.