Ертең ата-аналардың республикалық жиналысы өтеді

АСТАНА. ҚазАқпарат - Ертең, мамырдың 12-сі күні мектеп тарихындағы ең үлкен ата-аналар жиналысы өтеді. Бүгінде қазақстандықтар әлеуметтік желілер мен ұялы мессенджерлер арқылы ертеңгі жиналыс жайындағы ескертуді бір-біріне таратып жүр, деп хабарлайды ҚазАқпарат тілшісі.

Айта кетейік, бұған дейін ҚР Білім және ғылым министрі Ерлан Сағадиев республикалық ата-аналар жиналысын өткізуге мүдделі екенін мәлімдеген болатын. Ал 2 мамыр күні өткен Үкімет отырысында аталған жиналыстың нақты уақытын да жариялаған. «Осы сәтті пайдалана отырып, министрліктің 12-ші мамырда ата-аналардың республикалық жиналысын өткізуді жоспарлап отырғанын айтқым келіп отыр. Бүгінде ата-аналар жиналыстарына адамдардың қатысу деңгейі өте төмен, адамдардың тек 10 пайызы ғана қатысады. Енді, мамырдың 12-сі күні, барлық мемлекеттік органдар мен мекеме басшыларына ата-аналарды жиналысқа уақытында жіберуге Үкімет тарапынан тапсырма беруді сұраймыз. Осы жиналыста мектептердің қамқоршылық кеңесін сайлаумен білім саласының өзекті мәселелерін талқылау жоспарланып отыр», - деді  Ерлан Сағадиев. 

Айта кетейік, әлеуметтік желілер мен ұлы мессенджерлер арқылы таралып жүрген хабарландыруды жиналыстың уақыты сағат 18:30-ға беліленіп отыр.