Екібастұздық оқушы қыз таэквондодан Әлем кубогінің чемпионы атанды

АСТАНА. ҚазАқпарат - Беларусь астанасы Минск қаласында таэквондо ITF бойынша Әлем кубогі өтуде. Жарысқа 35 мемлекеттен 2000-ға жуық спортшы қатысты, деп хабарлайды Екібастұз әкімдігінің дене шынықтыру және спорт бөлімі.

Қазақстан Республикасының намысын Павлодар облысының ИТФ Таэквондо федерациясының төрт спортшысы қорғады: Али Узханов, Рүстем Нұров, Гүлжамал Мырзахан, Алина Самбуева. Спортшылар - Екібастұз қаласы 1-БЖСМ-нің таэквон-до бөлімінің аға-жаттықтырушысы Азамат Шакиловтың тәрбиеленушілері.

Жарыстың қорытындысы бойынша Али Узханов 45 келі салмақ дәрежесінде 14-15 жастағы жасөспірімдер арасында күміс жүлдегер атанды. Ол №21 ЖОББМ-нің 10-сынып оқушысы. 7 жылдан бері спортпен шұғылданады. Бір ай бұрын Қазақстан Республикасының спорт шебері атағына ие болған.

Нуров Рустам 35 келі салмақ дәрежесінде кадеттер арасында жүлделі екінші орынды жеңіп алды. Рустам №24 ЖОББМ-нің 7-сынып оқушысы. Таэквондомен 4 жылдан бері айналысады.

Алина Самбуева тұғырдың екінші сатысына көтерілді. Жүлдегер Абай Құнанбаев атындағы №2 ЖОББМ-нің 5-сынып оқушысы. Спорттың бұл түрімен небәрі 3 жыл айналысады.

Сондай-ақ, Гүлжамал Мырзахан 2017 жылғы Әлем кубогінің чемпионы атағына ие болды. Өткен жылы ол бірінші орынды иемденген болатын. Гүлжамал Абай Құнанбаев атындағы №2 ЖОББМ-нің 7-сынып оқушысы. Спорттың бұл түрімен 1-сыныптан бастап айналысады.