Душанбеде Қаныш Сәтбаевқа мемориалды тақта ашылды
«Тәжікстан Республикасы Ғылым академиясының Геология институтында Тәжікстан Ғылым академиясының бірінші шетелдік құрметті мүшесі, көрнекті қазақ ғалымы Қаныш Сәтбаевтың құрметіне мемориалды тақтаның ашылу салтанатты өтті. Ол тәжік Ғылым академиясының қызметін, Орталық Азияның геология ғылымын ұйымдастыруға зор үлес қосқан», - делінген Қазақстанның Тәжікстандағы елшілігі таратқан ақпаратта.
Салтанатты шарда сөз сөйлеген Қазақстан Елшісі Нұрлан Сейтімов ғылым саласындағы қазақ-тәжік байланыстарының алдағы уақытта да ретімен дами түсетіндігіне сенім білдірді. Сонымен қатар Қазақстан Елшілігінің Қаныш Сәтбаевты тәжік жерінде мәңгі есте қалдыру туралы ұсынысына қолдау жасаған Тәжікстан билігіне ризашылығын білдірді.
Ал Тәжістан ҒА вице-президенті Х.Муминов Қ.Сәтбаевтың тәжік жеріндегі қызметіне жоғары баға берді. Екі ел ғалымдарының бүгінгі буыны да ғылым саласындағы тығыз байланысты жалғастырып келе жатқанын айтты.
Шараға Тәжікстан ҒА басшылығы, ғылыми қоғамдастық, «Қазақстан-Тәжікстан» достық қоғамы және қазақ диаспорасының өкілдері қатысты.