Бозымбаев 4-мұнай зауытына қатысты шешім қашан қабылданатынын айтты

АСТАНА. ҚазАқпарат - 4-ші мұнай зауытының құрылысына қатысты нақты шешім 2018 жылдың екінші жартысында қабылданады. Бұл туралы бүгін ҚР Энергетика министрлігінің кеңейтілген алқа мәжілісінде ведомство басшысы Қанат Бозымбаев айтты, деп хабарлайды ҚазАқпарат.

«Мемлекет басшысының тапсырмасына сәйкес 4 мұнай өңдеу  зауытының құрылысына қатысты мәселе пысықталып жатыр. Жүргізілген сараптама тұтынудың болжамды өсімін ескергенде автомобиль бензиніне тапшылық 2021-2023 жылдары аралығында, дизель отынына 2023 жылы және авиакеросинге 2026 жылдан кейін қалыптасатындығын көрсетіп отыр», - деді Қанат Бозымбаев.

Оның айтуынша, Энергетика министрлігінің басшылығымен «ҚазМұнайГаз» ұлттық компаниясы 2018 жылдың екінші жартыжылдығында 4-ші мұнай өңдеу зауытының алдын ала техникалық-экономикалық негіздемесін әзірлейтін болады.

«Еінші жартыжылдықта құрылыстың  жүргізілу мүмкіндігі, орналасатын орны және зауыттың қуаты туралы нақты шешім қабылданады», - деді министр.